Azərbaycanda əməkhaqqı və digər ödənişlərin vahid elektron mexanizm vasitəsilə həyata keçirilməsi təklif olunur.
Bu barədə Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin rəisi Vəli Quliyev Milli Məclisin İqtisadi siyasət, sənaye və sahibkarlıq komitəsinin iclasında bildirib.
Onun sözlərinə görə, təklifə əsasən, əməkhaqqının hesablanması və faktiki ödənilməsi barədə məlumatlar müvafiq dövlət qurumuna təqdim olunacaq. İşçilərin böyük əksəriyyətinə maaş və digər ödənişlərin Nazirlər Kabinetinin elektron informasiya sisteminə ötürülən məlumatlar əsasında, Mərkəzi Bankın müəyyən etdiyi elektron ödəniş sistemi vasitəsilə verilməsi nəzərdə tutulur.
Yeni mexanizm çərçivəsində ödənişlər işçinin sərbəst seçdiyi elektron hesaba köçürüləcək.
Vəli Quliyev bildirib ki, dəyişiklik əməkhaqlarının vaxtında və tam ödənilməsinə imkanları genişləndirməli, gecikmələrin aşkar edilməsini asanlaşdırmalıdır. Eyni zamanda, əməkhaqqı və sosial sığorta ödənişlərinin elektronlaşdırılması ilə qeyri-rəsmi məşğulluğun və kölgə iqtisadiyyatının qarşısının alınması hədəflənir.
Təklifin işəgötürənlərin inzibati yükünü azaltması, sosial sığorta məlumatlarının avtomatlaşdırılması və vətəndaşların öz gəlirləri barədə məlumatlara çıxışını asanlaşdırması da gözlənilir. Mexanizm, həmçinin əməkhaqqı ödənişlərində şəffaflığın artırılmasına və elektron nəzarətin gücləndirilməsinə xidmət edəcək.
