Konqo Demokratik Respublikasında (KDR) Ebola virusu səbəbindən həyatını itirənlərin sayı 864 nəfərə yüksəlib.
EFE agentliyinin yaydığı məlumata görə, ölkədə indiyədək 2 181 nəfərdə Ebola infeksiyası təsdiqlənib. Onlardan 722-si xəstəxanaya yerləşdirilib, 412 nəfər isə sağalaraq evə buraxılıb. Hazırda virusdan ölüm göstəricisi 39,6 faiz təşkil edir.
Epidemiya əsasən ölkənin şərqində yerləşən İturi, Şimali Kivu, Cənubi Kivu, Yuxarı Uele və Çopo əyalətlərini əhatə edir. Ən çox yoluxma halı isə epidemiyanın episentri sayılan İturi əyalətində qeydə alınıb.
Konqo hökuməti bildirib ki, infeksiyanın yayılmasının qarşısını almaq üçün epidemioloji nəzarət, erkən diaqnostika, xəstələrin müalicəsi və yoluxanlarla təmasda olan şəxslərin müəyyənləşdirilməsi istiqamətində tədbirlər gücləndirilib.
Qeyd edək ki, epidemiyanın yayıldığı qonşu Uqandada son Ebola xəstəsi də xəstəxanadan evə buraxılıb. Bu ölkədə ümumilikdə 20 yoluxma halı qeydə alınıb, iki nəfər isə virusdan həyatını itirib.
