Bakı Şəhər Dövlət Yol Polisi İdarəsi sentyabrın 24-də başlayacaq “2026 Formula-1 Azərbaycan Qran Prisi” ilə əlaqədar sürücülərə müraciət edib. Qran-Prinin 24–26 sentyabr tarixlərində keçirilməsi nəzərdə tutulub.
Bildirilib ki, bəzi küçə və prospektlərdə hərəkətin məhdudlaşdırılması ilə əlaqədar paytaxtın cənub istiqamətindən şəhər mərkəzinə gələn sürücülərə alternativ yollardan istifadə etmək tövsiyə olunur.
Belə ki, “Azneft” və “Neftçilər” dairələrinə alternativ olaraq Bakı-Salyan yolunun 14-cü kilometrliyindən Lökbatan dairəsi istiqamətində, daha sonra üçüncü kənar dairəvi yolla “20 Yanvar” və ya Yeni Yasamal ərazisindən keçməklə hərəkət etmək tövsiyə edilir.
20-ci sahə və Bayıl qəsəbəsində yaşayanlara isə qəsəbədaxili yollarla Qurban Abbasov küçəsinə çıxaraq Teymur Elçin, Mehdi Hüseyn və Lermontov küçələri vasitəsilə şəhər mərkəzinə hərəkət etmək tövsiyə olunub.
DYP yol hərəkəti iştirakçılarından yarışın keçirildiyi müddətdə fərdi minik avtomobillərindən mümkün qədər az istifadə etməyi və şəhərin mərkəzi hissəsinə ictimai nəqliyyat vasitələri ilə getməyi xahiş edib.
