Sosial şəbəkələrdə avtomobilləri arxadan çəkən və sürət həddinin pozulmasını müəyyən etdiyi iddia olunan cihazlarla bağlı görüntülər yayılıb.
DİN-in Nəqliyyatı İntellektual İdarəetmə Mərkəzindən bildirilib ki, görüntülərdə əks olunan qurğu sürət ölçən cihaz deyil.
Qeyd olunub ki, elektron cihaz yollarda nəqliyyat vasitələrinin hərəkət intensivliyinin ölçülməsi və nəqliyyat axınının monitorinqi məqsədilə istifadə olunur.
Cihaz vasitəsilə nəqliyyat vasitələrinin hərəkət intensivliyi ilə bağlı məlumatlar toplanır və həmin məlumatlardan yol hərəkətinin təşkili, nəqliyyat axınının təhlili və idarə olunması prosesində istifadə edilir.
Bildirilib ki, qurğunun inzibati xəta barədə elektron protokol tətbiq etmək funksiyası yoxdur.
Qeyd edək ki, “Beton yol” kimi tanınan Zığ-Hövsan-Hava limanı yolunda yeni texniki vasitələr quraşdırılıb. Sosial şəbəkələrdə həmin qurğuların avtomobilləri digər radarlar kimi ön tərəfdən deyil, arxadan çəkdiyi iddia olunub.
