Azərbaycanda kredit götürən şəxslərin işsiz qalma riskindən sığortalanmasını nəzərdə tutan yeni mexanizm hazırlanır. Təşəbbüsə əsasən, müəyyən hallarda kredit öhdəliklərinin sığorta şirkəti tərəfindən qarşılanması mümkün olacaq.
Milli Məclisin deputatı Vüqar Bayramov bildirib ki, hazırda borcalanların həyatı, ölümü və əmək qabiliyyətini itirməsi ilə bağlı sığorta tətbiq olunsa da, hazırlanan yeni qaydalar işsiz qalma riskini də əhatə edəcək.
“Vətəndaşlarımız kredit götürürlər, amma onlardan asılı olmayan səbəbdən həmin kreditin ödənilməsində çətinlik yaranır. Vətəndaşımızın iş yeri bağlanır və ya işdən azad olunur. Kredit risklərinin sığortalanması belə hallar baş verən zaman öhdəliyin sığorta şirkəti tərəfindən ödənilməsinə imkan verəcək”, – deyə deputat qeyd edib.
Onun sözlərinə görə, bu mexanizm həm vətəndaşların maliyyə yükünü azaldacaq, həm də bankların kredit risklərini aşağı salacaq.
Deputat qeyd edib ki, yeni sığorta növünün tətbiqi kredit götürənlər üçün əlavə xərc yarada bilər. Buna görə də bankların kredit faizlərində müəyyən endirim etməklə bu xərci kompensasiya etməsi mümkün hesab olunur.
“Azərbaycanda kredit faizlərinin yüksək olduğunu nəzərə alsaq, banklar müəyyən faiz azalmalarına getməklə bu sığorta növünün tətbiqi halında kredit xərclərindəki artımı kompensasiya edə bilərlər”, – V.Bayramov vurğulayıb.
Deputat hesab edir ki, kredit risklərinin sığortalanması ilə bağlı qaydaların qısa müddətdə təsdiqlənməsi həm bank sektorunda mütərəqqi dəyişikliklərə səbəb olacaq, həm də maliyyə sabitliyini gücləndirəcək.
