Dünya çempionatı-2026-nın İngiltərə–Argentina yarımfinalı yüksək təhlükəsizlik tədbirləri altında keçiriləcək. ABŞ Federal Təhqiqatlar Bürosu (FTB) və FIFA qarşılaşmanı yüksək riskli oyunlar siyahısına daxil edib.
“Mirror” qəzetinin məlumatına görə, stadionda azarkeşlərin sektorlara görə ayrılması nəzərdə tutulmasa da, mümkün insidentlərin qarşısını almaq üçün hər iki komandanın fanatları fərqli giriş qapılarından buraxılacaq.
Qarşılaşma bu gün ABŞ-nin Atlanta şəhərində keçiriləcək və Bakı vaxtı ilə saat 23:00-da başlayacaq.
Matçın qalibi iyulun 19-da ABŞ-nin Nyu-Cersi ştatının İst-Raterford şəhərində keçiriləcək finalda İspaniya millisi ilə üz-üzə gələcək.
