Çinli alimlər gənə dişləməsi ilə insana keçən yeni virus növü – Asiya uzunayaqlı gənəsinin nayrovirusunu (ALTNV) aşkar ediblər.
Yeni virus trombositopenik sindromla müşayiət olunan ağır qızdırma (SFTS) xəstəliyinin araşdırılması zamanı müəyyən edilib. Alimlər SFTS diaqnozu qoyulan xəstələrin bir hissəsində xəstəliyin əsas törədicisi olan “Dabie bandavirus”unu aşkarlaya bilməyiblər.
Araşdırma nəticəsində SFTS-ə bənzər simptomlara səbəb olan ALTNV müəyyən edilib. Virus yoluxmuş gənənin dişləməsi ilə ötürülür və insanda halsızlıq, həzm sistemində pozğunluq, qızdırma və digər simptomlara səbəb ola bilir.
ALTNV infeksiyasının təkbaşına ölümlə nəticələndiyi hələ müəyyən edilməyib. Lakin “Dabie bandavirus”u ilə eyni vaxtda yoluxan 38 xəstədən 7-si vəfat edib.
