2020-ci il sentyabrın 27-də başlayan Vətən müharibəsi 44 gün davam edib və noyabrın 10-da başa çatıb. Müharibə nəticəsində Azərbaycan Ordusu bir sıra rayonları, yaşayış məntəqələrini və strateji yüksəklikləri işğaldan azad edib.
Müharibə zamanı 2 908 hərbi qulluqçu şəhid olub, 6 nəfər itkin düşüb. Ermənistanın hərbi əməliyyatları nəticəsində 93 mülki şəxsin həlak olduğu, 454 nəfərin yaralandığı bildirilir.
Noyabrın 8-də Şuşanın azad edilməsi müharibənin gedişində mühüm mərhələ olub. Noyabrın 10-da Azərbaycan, Rusiya və Ermənistan arasında üçtərəfli Bəyanat imzalanıb.
Daha sonra Ağdam, Kəlbəcər və Laçın rayonları Azərbaycana qaytarılıb. 2023-cü il sentyabrın 19-20-də keçirilən lokal antiterror tədbirlərindən sonra Azərbaycan ərazi bütövlüyünün və suverenliyinin tam bərpa edildiyini açıqlayıb.
27 Sentyabr Prezident İlham Əliyevin 2 dekabr 2020-ci il tarixli sərəncamı ilə Anım Günü elan edilib. Bu gün Vətən müharibəsində və Azərbaycanın ərazi bütövlüyü uğrunda həlak olanların xatirəsi yad edilir.
