Azərbaycan Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidmətinin əməkdaşları avqustun 14-də Böyükşor gölünün müəyyən hissəsində suyun və ya səthin yaşıl rəngə çevrildiyini müəyyən ediblər.
İlkin müşahidələrə əsasən, yaşıl rəngli kütlənin daşların səthinə yapışması, selikli və yığıntı şəklində görünməsi, eləcə də müxtəlif yaşıl çalarlarda olması bu halın yosunların fotosintezi nəticəsində yaranması ehtimalını artırır.
Mütəxəssislərin bildirdiyinə görə, avqust ayı su hövzələrində bəzi yosun və sianobakteriyaların inkişafı üçün əlverişli şərait yarada bilər. Yüksək su temperaturu, intensiv günəş işığı və suda azot, fosfor kimi qida maddələrinin mövcudluğu bu orqanizmlərin sürətlə çoxalmasına və lokal yığıntıların yaranmasına səbəb ola bilər.
Bununla belə, Xidmət tərəfindən bildirilib ki, prosesin dəqiq səbəbini yalnız vizual müşahidələr əsasında müəyyənləşdirmək mümkün deyil. Bu məqsədlə Mərkəzi Laboratoriyanın əməkdaşları tərəfindən göldən nümunələr götürülüb.
Hazırda nümunələr üzərində laborator analizlər aparılır. Nəticələrdən asılı olaraq müvafiq tədbirlərin görülməsi nəzərdə tutulur.
