Biləcəri-Yalama dəmir yolu sahəsində elektrikləşdirmə, siqnallaşdırma və telekommunikasiya sistemlərinin quraşdırılması layihəsinin ümumi dəyəri 447,88 milyon ABŞ dolları təşkil edir. Asiya İnkişaf Bankı (ADB) layihəyə 350 milyon dollar maliyyə dəstəyi göstərəcək.
Layihənin icrası və həyata keçirilməsi funksiyaları “Azərbaycan Dəmir Yolları” QSC-yə (ADY) həvalə edilib. İşlərin 31 dekabr 2030-cu ilədək başa çatdırılması planlaşdırılır.
Layihə çərçivəsində 302 milyon dollar elektrikləşdirmə, siqnallaşdırma və telekommunikasiya sistemlərinin layihələndirilməsi və quraşdırılmasına sərf olunacaq.
Bundan əlavə, tikintiyə nəzarət üzrə məsləhətçi xidmətlərinə 10 milyon dollar, layihənin icra qrupuna mütəxəssislərin cəlb edilməsinə 3,4 milyon dollar, layihənin idarə olunması üzrə məsləhət xidmətlərinə 2,5 milyon dollar ayrılması nəzərdə tutulur.
Müstəqil təhlükəsizlik yoxlamasına 750 min dollar, auditə 100 min dollar, layihənin icra qrupu üçün avadanlıq, mebel, nəqliyyat vasitələri və “1C” maliyyə uçotu proqramının alınmasına isə 207 min dollar xərclənəcək.
Layihənin Asiya İnkişaf Bankı, Asiya İnfrastruktur İnvestisiya Bankı (AIIB) və Azərbaycan hökumətinin birgə maliyyələşdirməsi hesabına həyata keçirilməsi planlaşdırılır.
Qeyd edək ki, Azərbaycan 1999-cu ildən ADB-nin üzvüdür. Həmin vaxtdan bank ölkəyə təxminən 5,6 milyard dollar investisiya yatırıb. Bunun 4,4 milyard dolları dövlət sektoruna, 1,2 milyard dolları isə özəl sektora yönəldilib. Əsas maliyyələşmə istiqamətləri energetika və nəqliyyat olub. Bu sahələrə müvafiq olaraq 1,7 milyard və 1,5 milyard dollar ayrılıb.
Yeni tərəfdaşlıq strategiyası çərçivəsində ADB-nin Azərbaycana 2,5 milyard dollaradək vəsait təqdim etməsi planlaşdırılır. 1966-cı ildə yaradılan bankın mənzil-qərargahı Filippinin paytaxtı Manilada yerləşir.
