Baş Dövlət Yol Polisi İdarəsi (BDYPİ) Salyanda dörd nəfərin ölümü ilə nəticələnən ağır yol-nəqliyyat hadisəsi ilə bağlı məlumat yayıb.
Bildirilib ki, qəzanın yüksək sürət və manevr etmə qaydalarının pozulması səbəbindən baş verdiyi ehtimal olunur.
Məlumata görə, hadisə iyulun 20-si saat 18:00 radələrində Salyan rayonunun Şorsulu kəndi ərazisində baş verib. Kənd sakini Nazim Qasımovun idarə etdiyi “VAZ” markalı avtomobillə əks istiqamətdə hərəkət edən Alçalı kənd sakini Razi Dadaşovun idarə etdiyi “Toyota” markalı avtomobil toqquşub.
Qəza nəticəsində Nazim Qasımov və sərnişinləri İlkin Qasımov, Elnur Əsədov hadisə yerində, Vüqar Əsədov isə xəstəxanada həyatını itirib. Sərnişin Əlifağa Hümmətov və Razi Dadaşovun azyaşlı oğlu isə müxtəlif xəsarətlər alıb.
Faktla bağlı araşdırma aparılır.
BDYPİ sürücülərə müraciət edərək onları yol hərəkəti qaydalarına ciddi riayət etməyə, yüksək sürət və təhlükəli manevrlərdən çəkinməyə çağırıb.
