Rusiya ordusunun Ukraynaya endirdiyi kütləvi raket zərbələri nəticəsində Dnepropetrovsk vilayətinin Krivoy Roq rayonunda bir ailənin altı üzvü həlak olub.
“Report”un məlumatına görə, Krivoy Roq Hərbi Administrasiyasının rəhbəri Aleksandr Vilkul bildirib ki, Rusiyanın Voronej vilayətindən buraxılan “İsgəndər-M” ballistik raketi Raduşnoye qəsəbəsində yerləşən fərdi yaşayış evinə düşüb.
Hücum nəticəsində dörd böyük və 5 və 12 yaşlı iki qız uşağı olmaqla ümumilikdə altı nəfər həyatını itirib.
Hadisə zamanı daha səkkiz nəfər yaralanıb. Yaralılar arasında 6 və 15 yaşlı iki oğlan uşağının da olduğu bildirilib.
