Bakının Yasamal və Xətai rayonlarının bəzi ərazilərində iyulun 30-da planlı təmir işləri ilə əlaqədar elektrik enerjisinin verilişində məhdudiyyət tətbiq ediləcək.
“Azərişıq” ASC-nin məlumatına görə, Yasamal Rayon Enerji Təchizatı və Satışı İdarəsinin xidməti ərazisində elektrik enerjisinin verilişində keyfiyyət göstəricilərinin artırılması və artan yük tələbatının qarşılanması məqsədilə saat 10:00-dan 13:00-dək İnşaatçılar prospekti və Nəriman Nərimanov prospektinin bir hissəsində elektrik enerjisinin verilişi məhdudlaşdırılacaq.
Xətai rayonunda isə cari təmir işləri ilə əlaqədar saat 09:00-dan 17:00-dək Xocalı prospekti, Natiq Əliyev, Fəzail Bayramov, İzzət Orucova, Ayaz İsmayılov və Mehdi Mehdizadə küçələrində elektrik enerjisinin verilişində fasilə yaranacaq.
Bildirilib ki, təmir işləri başa çatdıqdan sonra həmin ərazilər daha keyfiyyətli və dayanıqlı elektrik enerjisi ilə təmin olunacaq.
