Ötən il Azərbaycanda 69 206 hektar ərazi mina və partlamamış sursatlardan təmizlənib. Bu, ölkə üçün indiyədək qeydə alınan ən yüksək nəticədir.
Bu barədə Azərbaycan Respublikası Minatəmizləmə Agentliyinin (ANAMA) İdarə Heyəti sədrinin müavini Samir Poladov 4-cü Beynəlxalq Minatəmizləmə Konfransı çərçivəsində keçirilən panel müzakirədə bildirib.
Onun sözlərinə görə, 2026-cı il üçün hədəf 65 min hektardan çox ərazinin təmizlənməsidir. Hazırda bu göstərici 49 862 hektardır.
S.Poladov bildirib ki, dünyada minalarla çirklənmə ən böyük problemlərdən biri olaraq qalır. Azərbaycanda mina ilə çirklənmiş ərazilərin təxmini sahəsi 11 667 kvadratkilometrdir. Həmin ərazilərdə 1 milyondan çox minanın olduğu ehtimal edilir.
ANAMA rəsmisinin sözlərinə görə, 1991-ci ildən bu yana minalarla bağlı hadisələr nəticəsində 3 500-dən çox insan zərər çəkib.
