Azərbaycanda 2030-cu ilin sonunadək turistlərin daha rahat səfər edə bilməsi üçün ən azı 4 yeni turizm istiqamətinə uçuşların açılması planlaşdırılır.
Bu barədə Prezident İlham Əliyevin təsdiqlədiyi “Turizmin inkişafına dair 2026–2030-cu illər üçün Dövlət Proqramı”nda qeyd olunub.
Proqrama əsasən, hazırda fəaliyyət göstərən uçuş istiqamətləri üzrə reyslərin tezliyinin də 20 faiz artırılması nəzərdə tutulur.
Sənəddə həmçinin ən azı 10 əsas turizm bazarından Azərbaycana aviabiletlərin rəqabətqabiliyyətli qiymətlərlə təklif olunması və bununla ölkəyə gələn turistlərin sayının artırılması hədəflənir.
Bunun üçün regionlardakı hava limanlarına daha çox beynəlxalq reyslərin və aşağıbüdcəli aviaşirkətlərin cəlb edilməsi planlaşdırılır. Aviaşirkətləri stimullaşdırmaq məqsədilə hava limanı və yerüstü xidmət haqları, eləcə də reyslərin doluluq səviyyəsi ilə bağlı güzəşt və kompensasiya mexanizmlərinin tətbiqi nəzərdə tutulur.
