“Azərbaycan Hava Yolları” QSC (AZAL) sərnişinlərə uçuşlarda gecikmə, vaxt dəyişikliyi və ya reysin ləğvi zamanı diqqət yetirilməli məqamlarla bağlı müraciət edib.
Aviaşirkətdən bildirilib ki, hava şəraiti, texniki, əməliyyat və digər səbəblər uçuşların vaxtının dəyişməsinə, gecikməsinə və ya ləğvinə səbəb ola bilər. Belə hallarda sərnişinlərin mümkün qədər operativ məlumatlandırılması və səfərin davam etdirilməsi üçün zəruri dəstəyin göstərilməsi əsas məqsədlərdən biridir.
Oxşar xəbərlər
AZAL sərnişinlərə uçuşda gecikmə barədə əvvəlcədən məlumat verilsə belə, aviaşirkət tərəfindən başqa göstəriş olmadıqda ilkin uçuş vaxtını nəzərə alaraq hava limanına gəlməyi və qeydiyyat prosedurlarını vaxtında tamamlamağı tövsiyə edir. Sərnişinlərin uçuşdan ən azı 3 saat əvvəl hava limanında olması məsləhət görülür.
Uçuşun aktual statusunu AZAL-ın internet səhifəsi və mobil tətbiqi, elektron poçt, hava limanındakı məlumat ekranları və səsləndirilən elanlar vasitəsilə izləmək mümkündür. Sərnişinlər əlavə məlumat üçün aviaşirkətin hava limanındakı nümayəndələrinə və məlumat masalarına da müraciət edə bilərlər.
Uçuş vaxtında dəyişiklik olduqda sərnişinlə əlaqə bron zamanı qeyd olunan mobil nömrə və elektron poçt vasitəsilə saxlanılır. Bildirişlər SMS, WhatsApp və e-mail vasitəsilə göndərilə bilər. Buna görə bilet alarkən əlaqə məlumatlarının düzgün qeyd olunması tövsiyə edilir.
AZAL-ın məlumatına görə, beynəlxalq reyslərdə gecikmənin müddətindən asılı olaraq sərnişinlər üçün müxtəlif xidmətlər ödənişsiz təqdim olunur:
7 yaşına qədər uşağı olan sərnişinlərə ana və uşaq otağından istifadə imkanı verilir.
2 saatdan çox gecikmə zamanı sərinləşdirici içkilər təqdim olunur, həmçinin 2 telefon zəngi etmək və ya 2 elektron məktub göndərmək imkanı yaradılır.
5 saatdan çox gecikmə zamanı isti yemək təqdim edilir. Gecikmə davam etdikdə isti yemək gündüz hər 6 saatdan, gecə isə hər 8 saatdan bir verilir.
8 saatdan çox gecikmə zamanı mehmanxanada yerləşdirmə, hava limanından mehmanxanaya və geriyə transfer, həmçinin baqajın saxlanılması təşkil olunur.
Reysin gecikdiyi inzibati ərazidə daimi yaşayan sərnişinlər mehmanxana ilə təmin edilmir. Təqdim olunan xidmətlər gecikmənin səbəbindən və tətbiq olunan daşıma qaydalarından asılı olaraq dəyişə bilər.
