Bu barədə Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətindən bildirilib.
Bildirilib ki, azad edilmiş ərazilərdə Böyük Qayıdış prosesi davam edir, sakinlər yeni təmir olunmuş mənzillərlə təmin edilir. Lakin bəzi sakinlər yaşayış sahələrində istifadə nəticəsində yaranan cari təmir ehtiyaclarının, əlavə tikililərin, toyuq hini və mal-qara saxlamaq üçün tövlələrin dövlət hesabına inşa və ya təmir edilməsini tələb edirlər.
Oxşar xəbərlər
Qeyd olunub ki, şəxsi təsərrüfatın qurulması, əlavə yardımçı tikililərin inşası və yaşayış sahəsində uzunmüddətli istifadə nəticəsində yaranan cari təmir işləri üçün dövlət büdcəsində ayrıca maliyyə təminatı nəzərdə tutulmayıb.
Mənzillərin texniki vəziyyəti ilə bağlı müraciətlərə isə qanunvericiliyin tələblərinə uyğun baxılır. Tikinti və ya təhvil zamanı mövcud olmuş qüsurlarla bağlı əsaslandırılmış müraciətlər aidiyyəti üzrə araşdırılır.
Həmçinin bildirilib ki, tikililərin vəziyyəti ayrıca texniki qiymətləndirilə bilər. Tikinti qüsuru və ya zəmanət öhdəliyi müəyyən edilərsə, məsələ aidiyyəti qurum tərəfindən araşdırılır.
