Azərbaycanın Baş prokuroru Kamran Əliyev sentyabrın 29-da Moskvada Rusiya Ali Məhkəməsinin sədri İqor Krasnovla görüşüb.
Görüşdə Azərbaycan ilə Rusiya arasında münasibətlərin inkişafında dövlət başçıları arasında formalaşmış dostluq və qarşılıqlı etimada əsaslanan münasibətlərin mühüm rolu qeyd olunub.
İki ölkə arasında əlaqələrin strateji tərəfdaşlıq və müttəfiqlik qarşılıqlı fəaliyyəti prinsipləri əsasında inkişaf etdiyi, müxtəlif sahələrdə əməkdaşlığın genişləndirilməsi üçün zəminin mövcud olduğu vurğulanıb.
Kamran Əliyev iki ölkənin prokurorluq orqanları arasında uzun illər ərzində formalaşmış əlaqələrin yüksək səviyyədə olduğunu bildirib. Qarşılıqlı hüquqi yardım, cinayətkarlığa qarşı mübarizə, təcrübə və məlumat mübadiləsi istiqamətlərində əməkdaşlığın həyata keçirildiyi qeyd olunub.
Görüş zamanı Azərbaycan və Rusiya arasında hüquq sahəsində əlaqələrin gələcək inkişaf perspektivləri, institusional əməkdaşlığın möhkəmləndirilməsi, qarşılıqlı təcrübə mübadiləsi, hüquq təhsili və kadrların peşə hazırlığı sahəsində əməkdaşlıq imkanları müzakirə edilib.
İqor Krasnov azərbaycanlı həmkarları ilə konstruktiv münasibətlərin və uzunmüddətli əməkdaşlığın inkişaf etdirilməsində maraqlı olduğunu bildirib. O, görüşün iki ölkənin müvafiq qurumları arasında əlaqələrin daha da inkişafına töhfə verəcəyinə əminliyini ifadə edib.
Görüş çərçivəsində Kamran Əliyev İqor Krasnova “Prokurorluq orqanları ilə səmərəli əməkdaşlığa görə” medalını təqdim edib.
