Hazırda Azərbaycanda ağcaqanadlar vasitəsilə yayılan infeksiyalarla bağlı epidemioloji vəziyyət sabitdir və yerli yoluxma halları qeydə alınmayıb.
Xəbər Mərkəzi AZƏRTAC-a istinadən xəbər verir ki, bu barədə Respublika Gigiyena və Epidemiologiya Mərkəzi məlumat verib. Qurum bildirib ki, ölkəyə xaricdən gətirilə biləcək infeksiyaların qarşısının alınması məqsədilə epidemioloji nəzarət tədbirləri davam etdirilir.
Həmçinin bildirilib ki, yay mövsümündə yüksək temperatur və yağıntıların dəyişməsi həşəratların aktivliyinə təsir göstərə bilər. Lakin aparılan entomoloji monitorinqlər nəticəsində ölkədə həşəratlarla bağlı epidemioloji risklərin artdığı yeni ərazilər müəyyən edilməyib.
Vətəndaşlara yaşadıqları ərazilərdə həşəratların kütləvi artımını müşahidə etdikdə yerli icra hakimiyyətinə və ya aidiyyəti kommunal xidmətlərə müraciət etmələri tövsiyə olunub.
