Azərbaycanda taxıl biçini yekunlaşmaq üzrədir. Avqustun 3-nə olan operativ məlumata görə, biçilməsi nəzərdə tutulan 994,9 min hektar sahənin 925,1 min hektarı, yəni 93 faizi biçilib.
Biçilmiş sahələrdən ümumilikdə 3 milyon 131,9 min ton məhsul əldə olunub. Orta məhsuldarlıq hər hektara 33,9 sentner təşkil edib.
Yığılan məhsulun 1 milyon 534,8 min tonu buğda, 1 milyon 561,2 min tonu arpa, 35,9 min tonu isə digər dənli və dənli-paxlalı bitkilərin payına düşüb.
Ötən ilin eyni dövrü ilə müqayisədə ümumi məhsul yığımı 6,2 faiz, arpa istehsalı isə 15,9 faiz artıb. Buğda yığımı 2,1 faiz azalsa da, məhsuldarlıq 33,6 sentnerdən 36,5 sentnerə yüksəlib.
Hazırda 13 şəhər və rayonda biçin tam başa çatıb, daha 30 rayonda isə sahələrin 90 faizdən çoxu biçilib. Ən çox məhsul Cəlilabad, Şəki, Ağcabədi, Füzuli, Kürdəmir və Neftçala rayonlarında yığılıb. Ən yüksək məhsuldarlıq isə Ağcabədi, Tovuz, Bərdə və Sabirabad rayonlarında qeydə alınıb.
