Aurigid meteor yağışı bu gündən başlayaraq sentyabrın 5-dək aktiv olacaq. Meteor axını maksimum aktivliyinə sentyabrın 1-də çatacaq.
Aurigid meteorları Yer atmosferinə təxminən 66–67 km/s sürətlə daxil olur. Yüksək sürət onların atmosferdə parlaq və qısa müddətli işıq izləri yaratmasına səbəb olur. Meteorların böyük əksəriyyəti 70–100 km yüksəklikdə tamamilə yanaraq yox olur və Yer səthinə çatmır.
Bakıdan Aurigid meteorlarını müşahidə etmək üçün ən əlverişli vaxt avqustun 31-dən sentyabrın 1-nə keçən gecə, xüsusilə gecə yarısından sübhədək olan saatlardır. Bu zaman meteor yağının radianti üfüqdən kifayət qədər yüksəyə qalxır.
Bakı üçün radiantın maksimum hündürlüyü təxminən 61° olduğundan, real müşahidə zamanı saatda orta hesabla 5 meteor görmək mümkündür.
Meteor yağışını müşahidə etmək üçün teleskop tələb olunmur. Ən yaxşı nəticə şəhər işıqlarından uzaq, açıq səma altında adi gözlə müşahidə zamanı əldə edilir. Birbaşa radianta deyil, ondan təxminən 30–40° uzaqda yerləşən səma sahəsinə baxmaq daha məqsədəuyğundur. Çünki meteorların izləri həmin istiqamətdə daha uzun və aydın görünür.
