Rəqəmsal İnkişaf və Nəqliyyat Nazirliyi yanında Milli Kibertəhlükəsizlik Agentliyi (MKA) “Apple” məhsullarında aşkarlanmış təhlükəsizlik boşluğu ilə bağlı istifadəçilərə xəbərdarlıq edib.
Müəyyən “iOS”, “iPadOS” və “macOS” versiyalarında qeydə alınmış boşluq kiberdələduzlara cihazları ələ keçirmək və istifadəçi məlumatlarına icazəsiz çıxış əldə etmək imkanı yarada bilər.
Agentliyin məlumatına görə, hazırda vətəndaşlara xarici nömrələrdən zənglər edilir, “WhatsApp” və “Telegram” vasitəsilə aldadıcı mesajlarla zərərli fayllar göndərilir. Əməliyyat sistemlərinin ən son versiyalarından istifadə etməyən cihazlarda həmin fayllar təhlükəsizlik riski yarada bilər.
MKA istifadəçilərə “iPhone”, “iPad” və “Mac” cihazlarının əməliyyat sistemlərini ən son versiyaya yeniləməyi, naməlum və etibarsız mənbələrdən gələn faylları açmamağı, həmçinin avtomatik sistem yeniləmələrini aktivləşdirməyi tövsiyə edib.
