Baş Prokurorluq, Daxili İşlər Nazirliyi və Ədliyyə Nazirliyinin Penitensiar Xidməti tərəfindən aparılan birgə istintaq və əməliyyat-axtarış tədbirləri nəticəsində ötən il itkin düşmüş 1954-cü il təvəllüdlü Lyudmila Timofeyevanın qəsdən öldürüldüyü müəyyən edilib.
İbtidai istintaq zamanı toplanmış sübutlara əsasən, 1994-cü il təvəllüdlü Elnur Məmmədov 2025-ci ilin iyulunda Şüvəlan qəsəbəsində birgə yaşadıqları evdə anası ilə mübahisə edib. O, anasına çoxsaylı yumruq və təpik zərbələri vurub. Ağır xəsarətlər alan qadın hadisə nəticəsində ölüb.
İstintaqın məlumatına görə, E.Məmmədov daha sonra anasının meyitini yaşadıqları evin həyətində basdırıb.
Hadisə yerinə baxış zamanı aparılan qazıntı işləri nəticəsində insan skeleti aşkar edilərək götürülüb.
Faktla bağlı Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb. Elnur Məmmədov təqsirləndirilən şəxs qismində cəlb edilərək ona ittiham elan olunub.
İstintaq davam etdirilir.
