Bu gün Bakıda “Alufar IRONMAN 70.3 Baku” triatlon yarışı keçirilib.
Yarış Azərbaycan Respublikasının Gənclər və İdman Nazirliyi, Azərbaycan Triatlon Federasiyası və Bakı Şəhər Halqası Əməliyyat Şirkətinin təşkilatçılığı ilə baş tutub.
Yarışın finiş xəttini ilk olaraq ABŞ təmsilçisi Maksim Kryat 4 saat 1 dəqiqə 21 saniyə nəticə ilə keçib. Lakin ən yaxşı vaxtı xorvatiyalı Matej Yukiç göstərib – 4 saat 1 dəqiqə 20 saniyə.
Azərbaycan idmançıları arasında finiş xəttinə ilk çatan Teymur Fərəcov (40–44 yaş) olub. O, məsafəni 4 saat 36 dəqiqə 10 saniyəyə başa vurub.
Yarışda üç Azərbaycan təmsilçisi öz yaş kateqoriyalarında qalib olub. Leyla Abdulazizova (18–24 yaş) və Natalya Vallek (50–54 yaş) qadınlar, Anatoliy Afonenko (75–79 yaş) isə kişilər arasında birinci yer tutub. Tural Atakişiyev (18–24 yaş) isə öz yaş kateqoriyasında ikinci olub.
Azərbaycan Triatlon Federasiyasının prezidenti Fərid Fərhadzadə də yarışda iştirak edərək məsafəni uğurla başa vurub.
Estafet yarışında kişilər arasında Azərbaycanı təmsil edən Team Metak (AlfaTriClub), qarışıq estafetdə isə Team Turan Team ikinci yer tutub.
“IRONMAN 70.3” yarışı kişilər və qadınlar arasında 13 yaş kateqoriyası üzrə keçirilib. Tədbir çərçivəsində qadın, kişi və qarışıq komandaların iştirakı ilə estafet yarışları da təşkil olunub. Ümumilikdə 47 komanda estafet yarışında mübarizə aparıb.
Yaş kateqoriyaları üzrə qaliblər:
- 18–24 yaş, kişilər – Alexandre Julyen (Fransa)
- 18–24 yaş, qadınlar – Leyla Abdulazizova (Azərbaycan)
- 25–29 yaş, kişilər – Saruxan Serter (Türkiyə)
- 25–29 yaş, qadınlar – Katarina Kasova (Slovakiya)
- 30–34 yaş, kişilər – Matej Yukiç (Xorvatiya)
- 30–34 yaş, qadınlar – Anastasiya Mosienko (Qazaxıstan)
- 35–39 yaş, kişilər – Julyen Leroks (Fransa)
- 35–39 yaş, qadınlar – Deliz Uilyams (Böyük Britaniya)
- 40–44 yaş, kişilər – Maksim Kryat (ABŞ)
- 40–44 yaş, qadınlar – Lai So Lisa Çeng (Honkonq, Çin Xalq Respublikasının xüsusi statusa malik bölgəsi)
- 45–49 yaş, kişilər – Aleksey Nikulin (Rusiya)
- 45–49 yaş, qadınlar – Ştefi Ridel (Almaniya)
- 50–54 yaş, kişilər – Dmitriy Semenov (Özbəkistan)
- 50–54 yaş, qadınlar – Natalya Vallek (Azərbaycan)
- 55–59 yaş, kişilər – Aleksey Retiunskiy (Qırğızıstan)
- 55–59 yaş, qadınlar – İdil Qazioqlu (Türkiyə)
- 60–64 yaş, kişilər – Vladimir Mixaylov (Qazaxıstan)
- 65–69 yaş, kişilər – Oleq Suxodolin (Rusiya)
- 65–69 yaş, qadınlar – Takako Morinaqa (Yaponiya)
- 70–74 yaş, kişilər – İskandar Şaxov (Özbəkistan)
- 75–79 yaş, kişilər – Anatoliy Afonenko (Azərbaycan)
- 80–84 yaş, kişilər – Valentin Çernov (Rusiya)
Estafet yarışlarının qalibləri isə belə olub:
- Qadın estafeti – Team Nomad Queens (Qazaxıstan)
- Kişi estafeti – Team Zynqaholics (Qırğızıstan)
- Qarışıq estafet – Team Triunuty (Qazaxıstan)
“Alufar IRONMAN 70.3 Baku” yarışında kişi və qadınlar arasında ən yaxşı nəticə göstərən 25 idmançı 2027-ci ildə ABŞ-də keçiriləcək “IRONMAN 70.3” Triatlon üzrə Dünya Çempionatına vəsiqə qazanıb.
Xatırladaq ki, “Alufar IRONMAN 70.3 Baku” yarışında dünyanın 62 ölkəsindən 1500 idmançı iştirak edib. “IRONMAN 70.3” yarışı 1,9 kilometr üzgüçülük, 90 kilometr velosiped və 21 kilometr qaçış mərhələlərindən ibarətdir.
