Erkən evlilik təkcə qanun pozuntusu deyil, həm də uşağın gələcəyinin əlindən alınması deməkdir.
Ailə, Qadın və Uşaq Problemləri üzrə Dövlət Komitəsinin mətbuat katibi Teymur Mərdanoğlu bildirib ki, Ağdaşda yetkinlik yaşına çatmayan şəxsin erkən evliliyə cəlb olunmasına cəhdlə bağlı daxil olan məlumat əsasında aidiyyəti qurumlar operativ tədbirlər həyata keçirib.
Araşdırma zamanı qızın 17 yaşında olduğu müəyyənləşdirilib və planlaşdırılan toy mərasimi təxirə salınıb.
Komitə rəsmisi qeyd edib ki, hadisənin işıqlandırılması zamanı öz övladının hüquqlarını pozmağa çalışan şəxslərin media nümayəndələrinə qarşı aqressiv davranması, çəkilişə mane olması və kameraya müdaxilə etməsi də təəssüf doğurur.
O vurğulayıb ki, media əməkdaşlarına qarşı zorakı davranış baş verənləri dəyişmir və qanun qarşısında məsuliyyəti aradan qaldırmır. Əksinə, belə hərəkətlər əlavə hüquqi məsuliyyət yarada bilər.
Teymur Mərdanoğlu valideynləri övladlarını vaxtından əvvəl ailə qurmağa məcbur etməməyə çağırıb. Onun sözlərinə görə, erkən evlilik uşaqların təhsil almaq, inkişaf etmək, peşə sahibi olmaq və müstəqil həyat qurmaq imkanlarını məhdudlaşdırır, həmçinin fiziki və psixoloji sağlamlıqları üçün ciddi risklər yaradır.
Komitə rəsmisi xatırladıb ki, Azərbaycan qanunvericiliyinə əsasən, nikaha daxilolma yaşı 18-dir və bu tələbin əsas məqsədi uşaqların hüquq və mənafelərinin qorunmasıdır.
