ABŞ-ın Pensilvaniya ştatında yerləşən Karlayl hava limanında yüngülmühərrikli təyyarə polis helikopteri ilə toqquşub.
Hadisə Bell 407 helikopteri və Cessna 150 təyyarəsinin təlim uçuşları zamanı baş verib. Təlim manevrlərindən sonra helikopter yerdə dayanıb. Enməyə yaxınlaşan təyyarə uçuş-enmə zolağı boyunca alçalıb, daha sonra sağa istiqamət dəyişərək helikopterə arxa hissədən çırpılıb.
Qəza nəticəsində Cessna 150-nin pilotu aldığı xəsarətlərdən hadisə yerində ölüb. İlkin məlumata görə, pilot təyyarədəki yeganə şəxs olub. Helikopterdə olan iki polis əməkdaşı isə ciddi xəsarət almayıb. Onların həyatının təhlükədə olmadığı bildirilib.
Qeyd edək ki, Karlayl hava limanında dispetçer qülləsi yoxdur. Buna görə də pilotlar uçuş zamanı radio tezlikləri vasitəsilə bir-biri ilə əlaqə saxlayırlar.
Qəzanın səbəbləri və digər təfərrüatlar ABŞ Federal Aviasiya Administrasiyası (FAA) və Milli Nəqliyyat Təhlükəsizliyi Şurası (NTSB) tərəfindən araşdırılır.
