ABŞ-nin Florida ştatında şəxsi təyyarənin qəzaya uğraması nəticəsində doqquz nəfər, o cümlədən texnologiya sahibkarı Adam Robinson, həyat yoldaşı və iki azyaşlı uşağı həlak olub.
“New York Post”un məlumatına görə, hadisə noyabrın 1-də Palm-Biç dairəsində baş verib. “Learjet 60” tipli təyyarənin göyərtəsində “Retention.com” və RB2B texnologiya şirkətlərinin banisi Adam Robinson, həyat yoldaşı Helen Şarp, dörd yaşlı qızı Emma və iki yaşlı oğlu Çarli olub.
Təyyarədə, həmçinin uşaqların dayəsi Anita Mariya Setina, ailənin dostları Reyçel Rid və Çarmi Fer, eləcə də iki pilot olub. Qəza nəticəsində onların hamısı həyatını itirib.
Təyyarə Texas ştatının Ostin şəhərindən Baham adalarına uçsa da, Florida ştatının Qrinakres şəhərində yaşayış massivinə düşüb.
İlkin istintaq məlumatlarına görə, təyyarə yerə çırpılmamışdan əvvəl parçalanmağa başlayıb. Qəzadan əvvəl ekipaj dispetçerlərə hava gəmisinin buz bağlaması və güclü turbulentliklə qarşılaşması barədə məlumat verib.
Hadisənin səbəblərini ABŞ-nin Milli Nəqliyyat Təhlükəsizliyi Şurası (NTSB) araşdırır. Həlak olan şəxslər və qəzanın təfərrüatları barədə məlumatlar NBC və AP-nin xəbərlərində də yer alıb.
