ABŞ-nin 11 ştatında “Halloween” bayramı ilə əlaqədar istirahət günlərində baş verən atışmalar nəticəsində azı 15 nəfər ölüb, onlarla insan yaralanıb.
Ən ciddi hadisə Texas ştatının Dallas şəhərində qeydə alınıb. Burada 75 dəqiqə ərzində baş verən üç ayrı atışma nəticəsində dörd nəfər ölüb, 15 nəfər yaralanıb.
Alabama ştatının Birmingem şəhərində yerli universitetlərin futbol matçından sonra “Legion Field” stadionunun yaxınlığında iki atışma baş verib. Hadisələr nəticəsində bir nəfər ölüb, səkkiz nəfər yaralanıb.
Delaver ştatında qeydə alınan iki atışmada bir nəfər ölüb, 14 nəfər yaralanıb. Ellendeyldə açıq havada keçirilən əyləncə gecəsi zamanı 17 yaşlı qız güllələnib, daha səkkiz nəfər xəsarət alıb. Nyuark şəhərində isə altı nəfər yaralanıb.
Kaliforniya ştatının Ferfild şəhərində yerləşən “Spirit Halloween” mağazasında baş verən atışma nəticəsində bir nəfər ölüb, altı nəfər yaralanıb. İlkin məlumatlara görə, hücum məqsədyönlü olub.
İllinoys, Arkanzas, Miçiqan, Kolorado, Florida və Missisipi ştatlarında da ölümlə nəticələnən atışmalar qeydə alınıb. Floridada iki nəfər ölüb, azı 11 nəfər yaralanıb. Missisipi ştatında isə gecə klubunda baş verən atışma nəticəsində iki nəfər ölüb, altı nəfər xəsarət alıb.
