Azərbaycan vətəndaşlarını hüquq-mühafizə orqanlarının, bankların və digər qurumların əməkdaşları kimi aldadaraq pul vəsaitlərini ələ keçirən beynəlxalq kiberdələduzluq şəbəkəsinin təşkilatçıları saxlanılaraq ölkəyə gətiriliblər.
Daxili İşlər Nazirliyinin Kibercinayətkarlıqla Mübarizə Baş İdarəsinin Ukrayna polisi ilə birgə keçirdiyi əməliyyat nəticəsində Kiyevdə qanunsuz fəaliyyət göstərən çağrı mərkəzlərində çalışan 11 nəfər saxlanılıb. Onların arasında beynəlxalq axtarışda olan şəbəkənin əsas təşkilatçıları — Nəriman İskəndərov, Elsun Əliyev, Elşad Musayev və Elşən Şükürov da var.
Araşdırmalar zamanı müəyyən edilib ki, şəbəkə Ukraynanın bir neçə şəhərində müxtəlif xidmət ofisləri adı altında yaradılmış çağrı mərkəzləri vasitəsilə fəaliyyət göstərib. Yeni üzvlərin cəlb edilməsi üçün “Telegram” platformasında informasiya texnologiyaları və müştəri xidmətləri sahəsində yüksək əməkhaqqı vəd edən iş elanları yerləşdirilib.
Şəbəkə üzvləri əvvəlcədən hazırlanmış danışıq ssenariləri əsasında Azərbaycan vətəndaşlarına zəng edərək özlərini hüquq-mühafizə orqanlarının, mobil operatorların, bankların və investisiya şirkətlərinin əməkdaşları kimi təqdim ediblər. Onlar vətəndaşlara hesablarında şübhəli əməliyyatların aparıldığı, pullarının təhlükədə olduğu, bank kartlarının bloklanacağı və ya adlarından qanunsuz maliyyə əməliyyatlarının həyata keçirildiyi barədə yalan məlumatlar veriblər. Bəzi hallarda isə yüksək gəlir vəd edən saxta investisiya təkliflərindən istifadə olunub.
Dələduzlar qorxu və təşviş yaratmaqla vətəndaşları pullarını guya təhlükəsiz hesablara köçürməyə, bank kartlarının məlumatlarını, SMS təsdiq kodlarını və digər məxfi şifrələrini açıqlamağa sövq ediblər.
İstintaqla həmçinin Ruslan Zakirov, Yasəf Bayramov, Elsevər Məmmədov, Dmitri Duşin və Ruslan Matveyevin kiberdələduzluq yolu ilə əldə edilən vəsaitlərin leqallaşdırılmasında iştirak etdikləri müəyyən olunub. Onların xaricdəki şəbəkə üzvləri ilə “Telegram” vasitəsilə əlaqə saxladıqları, əldə edilən pulları bank kartı hesablarında topladıqları, razılaşdırılmış faiz məbləğini götürdükdən sonra qalan vəsaiti kriptovalyutaya çevirərək xaricə göndərdikləri bildirilir.
Faktlarla bağlı Cinayət Məcəlləsinin müvafiq maddələri ilə cinayət işi başlanılıb. Şəbəkənin təşkilatçıları barəsində məhkəmənin qərarı ilə həbs qətimkan tədbiri seçilib. Saxlanılan digər şəxslərlə bağlı istintaq araşdırmaları davam etdirilir.
Daxili İşlər Nazirliyi vətəndaşları sosial şəbəkələrdə yüksək əməkhaqqı və asan qazanc vəd edən şübhəli iş təkliflərinə ehtiyatla yanaşmağa, kart məlumatlarını və SMS təsdiq kodlarını naməlum şəxslərlə paylaşmamağa, şübhəli zənglər zamanı deyilənləri rəsmi mənbələrdən yoxlamağa və kiberdələduzluq halları ilə bağlı dərhal polisə müraciət etməyə çağırıb.
Qeyd edək ki, kibercinayətkarlığın dünya iqtisadiyyatına vurduğu illik zərər son beş ildə 75 faiz artaraq 6 trilyon dollardan 10,5 trilyon dollara yüksəlib.
