Dövlət İmtahan Mərkəzi (DİM) iyulun 5-də keçirilmiş II və III ixtisas qrupları üzrə qəbul imtahanının nəticələrini elan edib.
Abituriyentlər nəticələr, cavab kartı və cavab vərəqinin qrafik təsviri, həmçinin açıq tipli tapşırıqlar üzrə qiymətləndirmə meyarları ilə DİM-in elektron xidmətləri vasitəsilə tanış ola bilərlər. Nəticələri mobil operatorlar vasitəsilə 7727 nömrəsinə imtahana buraxılış vərəqəsində göstərilən kodu göndərməklə də öyrənmək mümkündür.
İmtahanda iştirak üçün ərizəsi təsdiqlənmiş 41 623 abituriyentdən 1 182 nəfər imtahana gəlməyib. 16 nəfər isə qaydaları pozduğuna görə imtahandan xaric olunub və nəticələri ləğv edilib.
II ixtisas qrupu üzrə maksimum 400 balı Laçın rayon Oğuz tam orta məktəbinin məzunu Paşa İsbəndiyarlı toplayıb. Hər iki mərhələnin cəminə görə ən yüksək nəticəni isə 690 bal toplayan Sumqayıt şəhər 35 nömrəli məktəbin məzunu Zamin Kərimov göstərib.
III ixtisas qrupu üzrə maksimum 400 balı üç nəfər – Əli Məmmədzadə, Aydan Məmmədova və Orxan Mənsimli əldə edib. Hər iki mərhələnin yekununa əsasən ən yüksək nəticə 689,6 bal toplayan Əli Məmmədzadəyə məxsusdur.
İmtahan nəticələrindən narazı olan abituriyentlər 20 iyul saat 10:00-dan 22 iyul saat 17:00-dək DİM-in elektron sistemi vasitəsilə Apellyasiya Komissiyasına müraciət edə bilərlər.
