Oktyabrın 25-də ölkə ərazisində yağıntılı hava şəraiti davam edir. Bəzi yerlərdə yağıntılar leysan xarakterli, intensiv və güclüdür.
Milli Hidrometeorologiya Xidmətinin saat 10:00-a olan məlumatına görə, Laçın və Qubadlıya sulu qar, Kəlbəcər və Ordubadın dağlıq ərazilərinə isə qar yağıb. Kəlbəcərdə qar örtüyünün hündürlüyü 2 santimetrə çatıb.
Bakıda və Abşeron yarımadasında 9 millimetrədək yağıntı qeydə alınıb.
Rayonlar arasında ən çox yağıntı Neftçalada qeydə alınıb. Burada yağıntının miqdarı 48 millimetrə, yəni aylıq normanın 106 faizinə çatıb. Biləsuvarda 21 millimetr (aylıq normanın 46 faizi), Mingəçevirdə isə 20 millimetr (49 faizi) yağıntı düşüb.
Lerikdə 15, Lənkəranda 11, Qobustan, Astara və Daşkəsəndə 6, Salyanda 5 millimetr yağıntı qeydə alınıb. Ağstafa, Beyləqan, Sabirabad, Şahbuz, Quba, Bərdə, Gəncə, Gədəbəy, Yardımlı, Zaqatala, Culfa, Naxçıvan, Şəmkir, Goranboy, Tovuz, Balakən, Şəkinin Kişçay ərazisi, Xaltan, Ağdam, Naftalan, Kürdəmir, Tərtər, Yevlax və İmişlidə isə 4 millimetrədək yağıntı düşüb.
Şuşa, Xankəndi, Xocalı və Füzulidə də arabir yağış yağıb.
Daşkəsən, Göygöl, Gəncə, Şəmkir, Qusar, Qaxın Sarıbaş kəndi, Şəki, Xızı, Qrız və Göyçayda duman müşahidə olunur. Görünüş məsafəsi 500 metrədək məhdudlaşıb.
