Ermənistanın baş nazirinin müavini Mher Qriqoryan, ərazi idarəetməsi və infrastruktur naziri David Xudatyan, Şəhərsalma Komitəsinin sədri Yeqiazar Vardanyan və digər rəsmilər Sünik vilayətinə səfər ediblər.
Ermənistan hökumətinin mətbuat xidmətinin məlumatına görə, oktyabrın 21-də keçirilən səfər zamanı TRIPP layihəsinin infrastrukturunun layihələndirilməsinə başlanması ilə bağlı təşkilati məsələlər müzakirə olunub. Həmçinin layihənin növbəti mərhələləri nəzərdən keçirilib.
Ermənistanın xarici işlər naziri Ararat Mirzoyan daha əvvəl layihə çərçivəsində tikinti işlərinin 2026-cı ilin sonu və ya 2027-ci ilin əvvəlində başlaya biləcəyini bildirib. Onun sözlərinə görə, tikintinin 2027-ci ilin əvvəlində başlanması daha real görünür.
Hazırda ərazidə təmizləmə, texniki qiymətləndirmə və digər hazırlıq işlərinin aparıldığı bildirilir.
