Heydər Əliyev Fondunun vitse-prezidenti Leyla Əliyeva oktyabrın 21-də Özbəkistanın Səmərqənd şəhərində keçirilən “Uşaqların rifahına investisiya: gələcək nəsillərin dayanıqlı və ədalətli inkişafına doğru” Ümumdünya Sammitinin və Uşaq Onkologiyası üzrə İkinci Beynəlxalq Konqresin açılış mərasimində iştirak edib.
Açılış mərasimindən əvvəl Özbəkistanın birinci xanımı Ziroat Mirziyoyeva Leyla Əliyevanı və digər iştirakçıları qarşılayıb. Daha sonra birgə foto çəkdirilib.
Oktyabrın 21–22-də keçirilən tədbirlərdə 100-dən çox ölkənin nümayəndələri iştirak edir.
Sammit Özbəkistanın təşəbbüsü ilə BMT Baş katibinin uşaqlara qarşı zorakılıq məsələləri üzrə xüsusi nümayəndəsi, BMT-nin Uşaq Fondu (UNICEF), Ümumdünya Səhiyyə Təşkilatı və Dünya Bankı ilə birgə təşkil olunub.
Tədbirin yekununda Səmərqənd Bəyannaməsinin qəbul olunması gözlənilir.
