Bəhramtəpə–Biləsuvar yolunda baş verən qəza nəticəsində 30 yaşlı sərnişin həyatını itirib, sürücü isə yaralanıb.
Hadisə ötən gün saat 19:00 radələrində yolun Qızılkənd kəndi ərazisindən keçən 54-cü kilometrində qeydə alınıb. İmişli rayon sakini Elvin Məhərrəmovun idarə etdiyi “Mercedes” markalı avtomobil yoldan çıxaraq aşıb.
Qəza nəticəsində xəsarət alan sürücünün həmyerlisi Elnur Rüstəmov xəstəxanaya çatdırılsa da, onun həyatını xilas etmək mümkün olmayıb. Sürücünün vəziyyəti orta-ağır qiymətləndirilir. Faktla bağlı araşdırma aparılır.
İlkin ehtimala görə, qəzaya yüksək sürət və ötmə əməliyyatı zamanı yol hərəkəti qaydalarının pozulması səbəb olub.
Baş Dövlət Yol Polisi İdarəsi hadisə ilə əlaqədar sürücülərə müraciət edərək onları yol hərəkəti qaydalarına əməl etməyə və sükan arxasında məsuliyyətli olmağa çağırıb.
