Azərbaycanda hakimiyyəti zorla ələ keçirməyə, konstitusiya quruluşunu zorla dəyişdirməyə çağırışlar və dini nifrət salınması ilə bağlı cinayət işi başlanıb.
Araşdırmalar zamanı Türkiyə vətəndaşı, 1975-ci il təvəllüdlü, “Şanlıurfa Olay” qəzetinin köşə yazarı Celal Çiftçinin sosial şəbəkələrdə bu məzmunlu materiallar paylaşdığı müəyyən edilib.
Oktyabrın 16-da faktlarla bağlı Cinayət Məcəlləsinin 281.2, 283.2.1 və 167-3.1-ci maddələri ilə cinayət işi başlanıb. Celal Çiftçi təqsirləndirilən şəxs qismində cəlb olunub və barəsində beynəlxalq axtarış elan edilib.
Baş Prokurorluq Türkiyənin səlahiyyətli orqanlarına beynəlxalq hüquqi yardım göstərilməsi ilə bağlı sorğular göndərib. Hazırda ibtidai istintaq davam etdirilir.
