Azərbaycan Respublikasının Prezidenti İlham Əliyev oktyabrın 16-da Gürcüstanın ölkəmizdə yeni təyin olunmuş fövqəladə və səlahiyyətli səfiri Qiorqi Zakaraşvilini qəbul edib.
Səfir etimadnaməsini dövlət başçısına təqdim edib.
Prezident İlham Əliyev söhbət zamanı bu ilin aprelində Gürcüstana etdiyi dövlət səfərini və səfər çərçivəsində göstərilən qonaqpərvərliyi məmnunluqla xatırlayıb.
Dövlət başçısı Azərbaycan-Gürcüstan münasibətlərinin zəngin tarixə və böyük gələcəyə malik olduğunu vurğulayıb. O, iki müstəqil dövlət arasında dostluq və strateji tərəfdaşlıq əlaqələrinin uğurla inkişaf etdiyini, xalqlarımızın qardaşlıq münasibətlərinə malik olduğunu bildirib.
Prezident İlham Əliyev səfirə fəaliyyətində uğurlar arzulayıb.
Qiorqi Zakaraşvili qəbul üçün minnətdarlığını bildirib, qardaş Azərbaycana səfir təyin olunmasından və Prezident İlham Əliyevlə görüşündən şərəf duyduğunu deyib. O, ölkələrimizin strateji tərəfdaş, xalqlarımızın isə bir-birinə yaxın olduğunu vurğulayıb və Azərbaycanla Gürcüstan arasında tarixən mövcud olan əməkdaşlığın daha da genişləndirilməsi üçün səylərini əsirgəməyəcəyini bildirib.
Görüşdə siyasi əlaqələrin inkişafından məmnunluq ifadə olunub, iqtisadi-ticari əməkdaşlıq, enerji təhlükəsizliyi, nəqliyyat-kommunikasiya və digər sahələrdə tərəfdaşlıq məsələləri müzakirə edilib.
Həmçinin Azərbaycan və Gürcüstanın enerji və nəqliyyat sahələrində həyata keçirdikləri birgə layihələrə toxunulub. Bu layihələrin yalnız regional deyil, qlobal səviyyədə də mühüm əhəmiyyət daşıdığı qeyd edilib.
