Paytaxtın Xəzər rayonunda ölümlə nəticələnən yol qəzasına görə məhkum edilən “Arzum 9999” ləqəbli tiktoker İlduzə Hacıyeva barəsində çıxarılan hökmdən apellyasiya şikayəti verib.
Şikayətə Bakı Apellyasiya Məhkəməsində hakim Elnur Nuriyevin sədrliyi ilə baxılacaq. İş üzrə ilkin məhkəmə iclası iyulun 22-nə təyin edilib.
Xatırladaq ki, Xəzər Rayon Məhkəməsinin hökmü ilə İlduzə Hacıyeva 2 il 6 ay müddətinə nəqliyyat vasitəsi idarə etmək hüququndan məhrum edilməklə, 5 il 2 ay azadlıqdan məhrum edilib və məhkəmə zalında həbs olunub.
Hadisə ötən ilin iyun ayında Mərdəkan qəsəbəsində baş verib. İttihama görə, İlduzə Hacıyeva avtomobili ilə dönmə əməliyyatı edərkən arxadan gələn nəqliyyat vasitəsinin qarşısına çıxıb. Nəticədə digər avtomobil idarəetmədən çıxaraq qəzaya uğrayıb. Hadisə zamanı bir nəfər ölüb, bir nəfər isə ağır xəsarət alıb.
Ona Cinayət Məcəlləsinin 263.2-ci (ölümlə nəticələnən yol hərəkəti qaydalarının pozulması) və 264-cü (hadisə yerini tərk etmə) maddələri ilə ittiham irəli sürülüb.
