Ukrayna Azərbaycanın humanitar yardımı vasitəsilə dəstəyini hiss edir.
Bunu Ukrayna Ali Radasının hakim “Xalqın xidmətçisi” partiyasından deputatı, Enerji siyasəti komitəsinin üzvü Sergey Naqornyak bildirib.
Onun sözlərinə görə, Azərbaycandan göndərilən generatorlar, transformatorlar və kabellər Ukraynaya ciddi dəstək verir. Deputat qeyd edib ki, ölkənin enerji sektorunda çatışmazlıq var və qış aylarında vəziyyət daha da çətinləşə bilər.
“Hazırda enerji sektorunda, Ukraynada qıtlıq var. Biz başa düşürük ki, qışda kifayət qədər çətin vəziyyətlər yarana bilər. Lakin dostlara, o cümlədən Azərbaycan xalqına, Prezident İlham Əliyevə minnətdarıq ki, mütəmadi olaraq Ukraynaya kömək edir. Bütün bunlar indi ölkəmiz üçün lazımdır ki, ukraynalılar növbəti qışı keçirə bilsinlər”.
Sergey Naqornyak Ukraynanın hazırda çətin dövrdən keçdiyini də vurğulayıb. O bildirib ki, yanacaqdoldurma məntəqələri təkcə cəbhəyanı ərazilərdə deyil, Kiyev də daxil olmaqla digər bölgələrdə də hücumlara məruz qalır.
“Yanacaqdoldurma stansiyalarımız vurulur. Zərbələr təkcə cəbhəyanı bölgələrdə deyil, həm də Kiyev şəhərinə endirilir. Kiyevlə Lvov arasındakı, Kiyevlə Xarkov arasındakı, Xarkovla Dnepr arasındakı əsas magistrallarda yanacaqdoldurma məntəqələri hədəfdir. Bu, müəyyən bir çağırışdır, çünki ilk növbədə bu yanacaqdoldurma stansiyaları həm təhlükəsizlik qüvvələrinin, həm tibb müəssisələrinin, həm həkimlərin, həm könüllülərin, həm də mülki əhalinin logistikasını təmin edir”.
Deputatın sözlərinə görə, mövcud çətinliklərə baxmayaraq, Ukrayna Azərbaycan kimi dost ölkələrin dəstəyi ilə mübarizəsini davam etdirir.
“Biz dəstəyə görə minnətdarıq və biz mütləq tab gətirəcəyik. Azərbaycandakı dostlarımıza uğurlar, Azərbaycana inkişaf arzulayırıq. Arzu edirik ki, Azərbaycan torpağı üzərində həmişə sülh olsun”.
