Fransada oktyabrın 13-də yeni irimiqyaslı ümummilli tətil və kütləvi etiraz aksiyaları keçiriləcək.
Fransa mediasının məlumatına görə, bunu Ümumi Əmək Konfederasiyasının (CGT) rəhbəri Sofi Bine bildirib.
Tələbələri, yuxarı sinif şagirdlərini və təhsil işçilərini təmsil edən həmkarlar ittifaqlarını birləşdirən Koordinasiya Komitəsi oktyabrın 13-nü etirazların əsas günü elan edib.
Yuxarı sinif şagirdlərinin etirazları artıq bir neçə həftədir davam edir. Sofi Bine hökuməti büdcə planına yenidən baxmağa çağırıb.
“Tələbələrin səfərbərliyi sizi öz məsuliyyətinizi dərk etməyə məcbur edir. Gənclər bizim ən dəyərli sərvətimizdir. Səthi tədbirlərlə bu səfərbərlikdən çıxa biləcəyinizi düşünməyin”, – o bildirib.
Tələbə İttifaqının mətbuat katibi Sabrin Harbax isə təhsil ehtiyacları üçün 10 milyard avro ayrılana qədər etirazların davam edəcəyini deyib.
“Bu, tələbə yoxsulluğuna və tədris müəssisələri binalarının dağılmasına son qoymaq üçün minimal məbləğdir”, – o vurğulayıb.
Bəzi hesablamalara görə, təhsil və səhiyyə sahəsindəki problemlərin həlli üçün 15 milyard avroyadək vəsait tələb olunur.
Məlumata görə, etiraz hərəkatının başlanğıcından bəri 6 800-dən çox şəxs həbs edilib. Onların böyük əksəriyyətinin yetkinlik yaşına çatmayanlar olduğu bildirilir.
