Ermənistan parlamentində hakim “Vətəndaş müqaviləsi” və müxalif “Güclü Ermənistan” fraksiyalarının deputatları arasında dava baş verib.
Hadisəyə “Güclü Ermənistan” fraksiyasının üzvü Edqar Kazaryanın çıxışı səbəb olub. Parlamentin spikeri Ruben Rubinyan dövlət vəsaitlərinin israf edilməsi ilə bağlı danışan deputatın çıxışını gündəlikdən kənara çıxdığı üçün yarımçıq kəsib və ona sözünü bitirməyə imkan verməyib.
Bundan sonra “Vətəndaş müqaviləsi” fraksiyasının deputatı Vahe Qalumyan yerindən qalxaraq “Güclü Ermənistan”ın deputatı Vahinak Vartanovun yanına gedib. Qalumyan Vartanovu bir neçə dəfə itələyib və bundan sonra deputatlar arasında dava düşüb.
Ruben Rubinyan fasilə elan edib, hadisəyə parlamentin təhlükəsizlik əməkdaşları müdaxilə ediblər. Deputatlar münasibətlərini daha sonra dəhlizdə də aydınlaşdırmağa davam ediblər.
