Bakının Xətai rayonunda yerləşən Şah İsmayıl Xətai abidəsinin postamentindəki lövhəyə əlavə edilmiş yazı ilə bağlı araşdırma aparılır.
Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətindən bildirilib ki, 1993-cü ildə ucaldılan abidə Nazirlər Kabinetinin 2 avqust 2001-ci il tarixli 132 nömrəli qərarı ilə ölkə əhəmiyyətli monumental və xatirə abidəsi kimi dövlət mühafizəsinə götürülüb.
Qeyd olunub ki, dövlət mühafizəsində olan abidələrin üzərində onların tarixi, bədii və memarlıq xüsusiyyətlərinə aid olmayan hər hansı əlavə yazı, element və ya müdaxilənin edilməsi yolverilməzdir.
Dövlət Xidməti tərəfindən heykəlin postamentinin üzərindəki lövhədə yer alan sözügedən yazının əlavə edilməsi məsələsi araşdırılır.
Məsələ, həmçinin müvafiq yerli icra hakimiyyəti orqanları ilə birgə və Mədəniyyət Nazirliyinin tabeliyində fəaliyyət göstərən Təsviri və dekorativ-tətbiqi sənət əsərləri üzrə Ekspert Komissiyası çərçivəsində ətraflı nəzərdən keçiriləcək.
Araşdırmanın nəticələri barədə əlavə məlumat veriləcəyi bildirilib.
Qeyd edək ki, sosial şəbəkələrdə abidənin üzərində müəllifin əsəri ailə üzvlərinə həsr etməsi ilə bağlı qeydin yerləşdirilməsi müzakirələrə səbəb olub.
