Dövlət Gömrük Komitəsinin Astara Gömrük İdarəsinin əməkdaşları tərəfindən xüsusilə külli miqdarda narkotik vasitənin tranzit yolla Azərbaycan ərazisindən keçirilməsinin qarşısı alınıb.
Komitədən bildirilib ki, Astara gömrük postunda İrandan Rusiyaya “kahı” və “kərəviz” yükü aparan yük nəqliyyat vasitəsi saxlanılaraq gömrük nəzarətinə cəlb edilib.
Nəqliyyat vasitəsi rentgen qurğusu və kinoloji xidmət itinin tətbiqi ilə yoxlanılıb. Yoxlama zamanı yükdə gizlədilmiş bağlamalar aşkar edilib.
Nəticədə gömrük nəzarətindən gizlədilən 230 ədəd “kərəviz” formalı qablaşdırmada ümumi xalis çəkisi 79 kiloqram 740 qram olan marixuana aşkar edilib.
Faktla bağlı araşdırma aparılır.
