Avropa İttifaqı Orta Dəhlizin inkişafı üçün 12 milyard avroyadək dövlət və özəl investisiya cəlb etməyi planlaşdırır.
Avropa Komissiyasının sədri Ursula fon der Lyayen bildirib ki, layihə Cənubi Qafqaz və Mərkəzi Asiyanı Avropa bazarı ilə birbaşa birləşdirəcək.
Onun sözlərinə görə, Aİ bu məqsədlə “Global Gateway” təşəbbüsündən istifadə edəcək. Məqsəd marşrutları şaxələndirmək, ticarət axınlarını üç dəfə artırmaq və 2030-cu ilə qədər yüklərin tranzit müddətini əhəmiyyətli dərəcədə azaltmaqdır.
Fon der Lyayen həmçinin bağlantı məsələləri ilə bağlı regional sammit keçiriləcəyini açıqlayıb. Sammitdə Orta Dəhlizin praktiki layihələrə çevrilməsi məsələləri müzakirə olunacaq.
Orta Dəhliz Mərkəzi Asiya, Xəzər dənizi və Cənubi Qafqaz üzərindən keçərək Avropa ilə Asiyanı birləşdirən əsas nəqliyyat marşrutlarından biri hesab olunur.
