Azərbaycan Baş nazirinin müavini, Azərbaycanla İran arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının həmsədri Şahin Mustafayev ilə İranın yol və şəhərsalma naziri, komissiyanın həmsədri Fərzanə Sadiq arasında telefon danışığı olub.
Telefon danışığı zamanı bu ilin fevralında Bakıda keçirilmiş Dövlət Komissiyasının 17-ci iclasının yekunlarına dair imzalanmış Anlaşma Memorandumunda əksini tapan məsələlərin icra vəziyyəti nəzərdən keçirilib.
Tərəflər iqtisadi-ticarət, nəqliyyat-tranzit, energetika, su və digər sahələrdə əməkdaşlığı, həmçinin həyata keçirilən layihələrin icra dinamikasını müzakirə ediblər.
Nəqliyyat sahəsində həyata keçirilən layihələr çərçivəsində Ağbənd–Kəlalə avtomobil körpüsünün tikintisinin başa çatdırılması mühüm nəticə kimi qeyd olunub.
Həmçinin Astara yük terminalında işlərin tamamlanması istiqamətində görüləcək zəruri işlər müzakirə edilib.
