Mərmərə dənizində Silivri sahillərində iki gəminin toqquşması nəticəsində batan “TUĞBERK İMAMOĞLU” gəmisinin yeri müəyyənləşdirilib.
Hadisə sentyabrın 2-də gecə saatlarında Silivridən təxminən 18 dəniz mili cənubda baş verib. Türkiyə bayraqlı “ALSU” və “TUĞBERK İMAMOĞLU” ticarət gəmiləri toqquşub. Nəticədə “TUĞBERK İMAMOĞLU” gəmisi batıb və 10 nəfərlik heyət itkin düşüb.
Türkiyə Milli Müdafiə Nazirliyindən bildirilib ki, batan gəminin yeri 850 metr dərinlikdə müəyyənləşdirilib. Gəminin heyətinin axtarışları davam etdirilir.
Hadisə ilə bağlı cinayət işi başlanılıb, araşdırma çərçivəsində saxlanılanlar var.
