Binəqədi şosesində nəqliyyatın hərəkəti ilə bağlı dəyişiklik edilir
Binəqədi şosesinin Mehdiabad yolu və Nicat Mustafayev küçəsi ilə kəsişmələrində, xüsusilə günün pik saatlarında müşahidə olunan nəqliyyat sıxlığının azaldılması məqsədilə yol hərəkətinin təşkilində dəyişikliklər ediləcək.
Layihə Nəqliyyatı Əlaqələndirmə Şurasında müzakirə olunaraq qəbul edilib.
Layihə çərçivəsində yol nişanları və nişanlanma xətləri vasitəsilə nəqliyyatın hərəkəti kanallaşdırılacaq. Kəsişmələrdə hərəkət zolaqlarının sayının artırılması, həmçinin Əttarlar küçəsindən yalnız sağa hərəkətin təşkil edilməsi nəzərdə tutulur.
Dəyişikliklərin əsas məqsədi yolun buraxıcılıq qabiliyyətini artırmaq və nəqliyyat axınları arasında yaranan münaqişəli nöqtələri minimuma endirməkdir.
Eyni zamanda, svetoforların iş rejimi optimallaşdırılacaq. Əsas hərəkət istiqaməti üzrə yaşıl işığın müddətinin uzadılması hesabına nəqliyyat axınının daha səmərəli və fasiləsiz hərəkətinin təmin edilməsi planlaşdırılır.
