Azərbaycan Respublikasının Minatəmizləmə Agentliyi (ANAMA) və BMT-nin Azərbaycandakı nümayəndəliyinin birgə təşkilatçılığı ilə IV Beynəlxalq Minatəmizləmə Konfransı keçirilib.
“Şəhərlərin bərpası üçün humanitar minatəmizləmə: Təhlükəsiz yaşayış məskənləri üçün mükəmməllik standartlarının müəyyənləşdirilməsi” mövzusunda keçirilən iki günlük konfransda humanitar minatəmizləmə sahəsində tərəfdaşlıqların inkişafı, birgə təşəbbüslər və beynəlxalq təcrübə müzakirə olunub.
Tədbirin ilk günündə Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Prezident İlham Əliyevin konfrans iştirakçılarına müraciətini oxuyub.
ANAMA İdarə Heyətinin sədri Vüqar Süleymanov konfransın mövzusunun Azərbaycanın təcrübəsini əks etdirdiyini bildirib.
BMT-nin Azərbaycandakı rezident əlaqələndiricisinin adından çıxış edən Hayat Nasar isə mina təhlükəsinə qarşı mübarizənin BMT, Azərbaycan hökuməti və ANAMA arasında əməkdaşlığın əsas istiqamətlərindən biri olduğunu qeyd edib.
Konfransın ikinci günündə panel müzakirələri davam etdirilib və yekunda bəyanat qəbul olunub.
