Şimali Kiprin Girnə sahillərində 8 nəfərin ölümü ilə nəticələnən gəmi qəzası ilə bağlı istintaq çərçivəsində saxlanılanlar arasında üç Azərbaycan vətəndaşı da var.
Xəbər Mərkəzi “Report”a istinadən xəbər verir ki, saxlanılan şəxslərin Xaçmaz rayonunun Palçıqoba kənd sakini Valeh Hümbətov, əslən Tərtərdən olan və Bakıda yaşayan Rəşad İbrahimov və Şabran rayon sakini Qədir Quliyevdir.
Valeh Hümbətovun anası Yeganə Hümbətova bildirib ki, oğlu qəza zamanı sağ olduğunu ailəsinə çatdırıb. Onun sözlərinə görə, Valeh daha sonra izahat vermək üçün aparıldığını deyib və ailə onunla əlaqə saxlaya bilməyib.
Rəşad İbrahimovun bacısı Türkan Təhməzova isə qardaşının xəstəxanada olduğunu və daha sonra saxlanıldığını sosial şəbəkələrdən öyrəndiklərini deyib. Ailəyə şirkət tərəfindən Rəşadın hadisə ilə bağlı prosedur çərçivəsində saxlanıldığı bildirilib.
Qədir Quliyevin qardaşı Nurət Quliyev də onun qəza zamanı sağ olduğunu və izahat vermək üçün aparıldığını bildirib. Ailə gəmi şirkətindən Qədirin vəziyyəti ilə bağlı məlumat alıb.
Qeyd edək ki, avqustun 30-da Şimali Kiprin Girnə sahillərində gəmi qəzaya uğrayıb. Son məlumatlara görə, 240 nəfər xilas edilib, 8 nəfər ölüb, 19 sərnişinin axtarış-xilasetmə işləri davam etdirilir.
