Azərbaycanda 3 yaşlı oğlan uşağının ət maşınında amputasiya olunan əli 8 saat davam edən mikrocərrahi əməliyyatla bərpa edilib.
Uşaq hadisədən təxminən 7 saat sonra Ə.Əliyev adına Azərbaycan Dövlət Həkimləri Təkmilləşdirmə İnstitutunun Plastik və Rekonstruktiv Cərrahiyyə Klinikasına çatdırılıb.
Travma nəticəsində uşağın sol biləyi və əl daraqları, həmçinin baş, işarə, orta və üzük barmaqları tam amputasiya olunub.
Xəstə təcili əməliyyata hazırlanıb. Dilqəm Məmmədov, Bəxtiyar Qasımov, Abidin Həsənli, anestezoloqlar Mail Sədiyev və Dayaq Əhmədlidən ibarət mikrocərrahi komanda tərəfindən kompleks rekonstruktiv əməliyyat həyata keçirilib.
Əməliyyat zamanı bilək və əl daraqlarının sümük strukturları anatomik vəziyyətə gətirilərək daxili fiksasiya olunub. Daha sonra əlin fleksor və ekstensor tendonları, radial və ulnar arteriyalar, median və ulnar sinirlər, eləcə də müvafiq digital arteriya və sinirlər mikrocərrahi üsulla bərpa edilib.
Təxminən 8 saat davam edən əməliyyatın bütün mərhələləri uğurla tamamlanıb.
Əməliyyatdan sonra uşaq 24 saat reanimasiya şəraitində intensiv monitorinq altında saxlanılıb. Vəziyyəti stabil olduğundan postoperativ dövrün ikinci günündə palataya köçürülüb.
Hazırda uşağın ümumi vəziyyətinin qənaətbəxş olduğu, bərpa olunan sol yuxarı ətrafın klinik vəziyyətində müsbət dinamikanın müşahidə edildiyi bildirilib. Ətrafın sağ qalması baxımından kritik postoperativ mərhələ də uğurla keçilib.
Uşaq uzunmüddətli funksional bərpa üçün mərhələli reabilitasiya proqramına cəlb edilib.
