ABŞ ordusunun İranın Hormozqan əyalətinin Sirik rayonunun Kuhestak şəhərinə endirdiyi zərbə nəticəsində ölən və yaralananların sayı artıb.
Hücum zamanı toy mərasiminin keçirildiyi evə raket qəlpələrinin düşdüyü bildirilir. Son məlumatlara görə, hadisə nəticəsində ən azı 4 nəfər, o cümlədən bir uşaq ölüb, 50-dən çox insan yaralanıb.
İran rəsmilərinin yaydığı məlumatlara görə, yaralılar yaxınlıqdakı Minab şəhərinin xəstəxanasına yerləşdirilib. Sirik qubernatoru yaralıların sayının 63 nəfərə çatdığını, onların 50-nin qadın və uşaq olduğunu bildirib.
Qeyd edək ki, ABŞ Silahlı Qüvvələri sentyabrın 1-də İran ərazisində bir sıra zərbələr endirib. Hücumların İranın İslam İnqilabı Keşikçiləri Korpusuna məxsus obyektlərə qarşı həyata keçirildiyi açıqlanıb. Eyni vaxtda İranın cənubundakı bir sıra şəhər və ərazilərdə partlayış səsləri eşidilib.
